2 Pinoy pinagnakawan, ginulpi sa New York

Dalawa na namang Pinoy ang nabiktima ng pag-atake sa New York.

Sa pahayag na inilabas ng Philippine Consulate General in New York kinondena nito ang panibagong pag-atake sa sa dalawang miyembro ng Filipino Community.

Ayon sa konsulada, noong Linggo, isang 73 anyos na Pinoy ang inatake ng isang homeless individual habang siya ay patungo sa simbahan sa pagitan ng 8th Avenue at 40th Street sa Manhattan.

Noong Lunes naman, isang 53-anyos na Pinoy ang ginulpi at pinagnakawan ng isa ring homeless individual sa McDonalds store sa 7th Avenue malapit sa 34th Street.

Ayon sa konsulada, umakyat na sa 34 ang naitalang anti-Asian hate incidents and criminal violence kung saan mga Pinoy ang biktima.

Dalawang linggo ang nakararaan, isang 67-anyos na Pinay ang inatake din sa Yonkers, New York.

Kaugnay nito muling pinaalalahanan ng Philippine Consulate General sa New York ang mga kababayan sa nasabing lugar na maging maingat. (DDC)