Kahit may karamdaman at nagpapagaling pa, Kris Aquino dumalo sa grand rally ni VP Leni Robredo sa Tarlac

Sa kabila ng karamdaman at kahit sumasailalim pa sa gamutan, dumalo si Kris Aquino sa grand rally nina Vice President Leni Robredo at Senator Kiko Pangilinan sa Tarlac.

Sa kaniyang pahayag sinabi ni Kris na may pinagdadaanan ang kaniyang kalusugan, kaya sinamahan siya ng kaniyang mga anak na sina Joshua at Bimby para mayroong umalalay sa kaniya.

Sinabi ni Kris na noong Miyerkules (Mar. 22) lamang niya nalaman na sa Tarlac gaganapin ang grand rally ni Robredo at agad siyang nagpasya na pupunta siya.

Hindi rin umano siya nagpapigil sa mga umaawat sa kaniya at nag-aalala sa kaniyang kalusugan.

Hiling ni Kris sa mga taga-Tarlac, ibigay kay Robredo ang boto sa halalan sa Mayo.

Sa kaniyang Instagram, ikinuwento din ni Kris na muli siyang aalis patungo sa ibang bansa para magpatuloy sa pagpapagamot. (DDC)