2 pulis patay sa misencounter sa pagitan ng mga ahente ng PDEA at tauhan ng QCPD

Dalawang pulis ang nasawi sa shootout sa pagitan ng mga tauhan ng Quezon City Police District at mga ahente ng Philippine Drug Enforcement Agency (PDEA) sa labas ng Ever Gotesco Mall sa Quezon City Miyerkules (February 24) ng gabi.

Nangyari ang shootout habang kapwa umano nagkakasa ng drug buy bust operation ang magkabilang panig.

Ayon kay National Capital Region Police Office chief Brigadier General Vic Danao dalawang tauhan ng QCPD ang nasawi habang isa pa ang sugatan.

Mayroon ding tatlong ahente ng PDEA ang dinala sa ospital.

Kinumpirma naman ni Danao na “misencounter” ang nangyari.

Sa panig ng PDEA sinabi nitong lehitimo ang operasyon ng kanilang mga tauhan sa lugar.

Ang naturang engkwentro ay nagresulta sa pagsasara ng eastbound lane ng Commonwealth Avenue dahilan para maraming motorista ang ma-stranded.

Naalarma din ang mga namimili sa Ever Gotesco Mall nang marinig ang sunud-sunod na palitan ng putok.