2 Pinoy patay, 6 pa ang sugatan sa pagsabog na naganap sa Lebanon

Kinumpirma ng Department of Foreign Affairs (DFA) na mayroong dalawang Pinoy na kabilang sa mga nasawi sa pagsabog na naganap sa pantalan sa Beirut, Lebanon.

Maliban sa dalawang Pinoy na nasawi, ay mayroon pang anim na Pinoy na nasugatan.

Ang mga nasawi at nasugatang Pinoy ay pawang nasa bahay ng kanilang mga amo nang mangyari ang pagsabog.

Ayon sa DFA sa ngayon patuloy ang pakikipag-ugnayan ng embahada ng Pilipinas doon sa Filipino Community.

Ito ay para matukoy ang kalagayan ng lahat ng Pinoy sa Lebanon.

Tinatayang nasa 33,000 pa ang Pinoy sa nasabing bansa at malaking bilang nito ay nasa Beirut.

Sa datos ng mga opisyal sa Lebanon, sumampa na sa mahigit 70 ang nasawi sa pagsabog at mahigt 3,500 ang nasugatan.