Mga nakasuot ng DOH shirt sa campaign rally sa Ilocos Sur, hindi umano empleyado ng kagawaran

Nilinaw ng Department of Health (DOH) na hindi empleyado ng kagawaran ang mga nakuhanan ng larawan na nakasuot ng DOH T-shirt habang dumadalo sa campaign rally ng BBM-Sara Uniteam sa Ilocos, Sur.

Sa inilabas na pahayag, sinabi ng DOH nabatay sa beripikasyon ng kanilang regional office ang nasabing mga indbidwal ay pawang health workers na empleyado ng Local Government Units (LGUs).

Sinabi ng DOH na walang authority ang kagawaran sa mga health workers na employed o direktang nagtatrabaho sa LGUs.

Ayon sa DOH, bilang bahagi ng kanilang promotion campaigns at outreach programs ay nakapamahagi sila noon ng mga T-shirt na mayroong DOH logo.

Ipinamigay ito sa mga health at non-health workers.

Kaugnay nito, umapela ang DOH sa publiko na huwag gamitin ang nasabing mga T-shirt kapag nag-eendorso ng kandidato para sa eleksyon. (DDC)