Aika Robredo: Mga programa ng OVP patunay kung anong klaseng lider si VP Robredo ayon kay Aika Robredo

Ang mga programa ng Office of the Vice President ang magpapatunay kung anong klaseng lider si Vice President Leni Robredo.

Sa panayam ng 92.1 Infinite Radio Calbayog kay Aika Robredo, sa kabila ng limitadong resources at kakulangan ng budget, ginawa ng OVP ang lahat para maisakatuparan ang mga programa nito.

Sinabi ni Aika na maraming nagtiwala kay VP Leni at tumulong para maisulong ang mga proyekto.

“Ang OVP kulang talaga sa budget, pero kung ano man ang kakulangan, binabawi niya sa tiwala at generosity ng mga partners niya,” ayon kay Aika.

Binanggit ni Aika ang Bayanihan e-Konsulta na ngayon ay labis na pinagkaka-abalahan ng mga staff as OVP dahil sa dami ng mga nais makapagpa-check up.

Ang mga doktor at iba pang personnel sa Bayanihan e-Konsulta ay pawang volunteers.

“Ngayon pa lang na limitado ang budget at resources (marami nang programa) paano pa kaya kung mas mapalawak niya ang mga programa ng OVP sa mas marami pang lugar?,” dagdag pa ni Aika.

Ayon kay Aika, excited silang makita kung ano pa ang magagawa ng kanilang mama kung mas malaki ang resources at kung mabibigyan siya ng pagkakataon na pamunuan ang bansa.

“Kung susuriin natin ang mga programa niya, magandang patunay ito kung anong klaseng leader siya,” dagdag pa ni Aika. (DDC)