Aktres na si Coney Reyes tuwang-tuwa sa natanggap na “Pamaskong Handog” mula sa Pasig City LGU
Natanggap na ng aktres na si Coney Reyes ang kaniyang Pamaskong Handong ngayong taon mula sa Pamahalaang Lungsod ng Pasig.
Masayang ibinahagi ni Reyes sa kaniyang Instagram ang larawan ng Pamaskong Handog at ang larawan kasama ang mga volunteer na namamahagi nito.
Pinasalamatan ni Reyes ang mga volunteer na matyagang nagbabahay-bahay para maipamahagi ang gift packs.
Kuwento naman ng anak ni Reyes na si Pasig City Mayor Vico Sotto, noong nakaraang taon ay ipinamigay niya ang Pamaskong Handog na para sa kanilang bahay.
“Tuwang-tuwa nanay ko sa natanggap niyang Pamaskong Handog mula sa LGU. Last year kasi pinamigay ko yung para sa bahay namin. Sabi niya, ok lang naman ipamigay, pero sana mahawakan niya man lang daw muna. Ngayon, siya na mismo ang sumalubong sa team,” kuwento ng alkalde.
Lahat ng household sa Pasig ay makatatanggap ng Pamaskong Handog.
Base sa datos, hanggang noong Dec. 8, nakaikot na ang Pamaskong Handog team sa 62% ng area sa Pasig City at mahigit 220,000 na pamilya na ang nabigyan. (DDC)
