17 colorum na sasakyan hinuli ng I-ACT sa ikinasang operasyon sa Laguna
Nasagawa ng operasyon ang Inter-Agency Council for Traffic (I-ACT) task force sa Sta. Rosa at Calamba, Laguna, Miyerkules (Jan. 27) ng umaga.
Sa nasabing operasyon nahuli at na-impound ang 17 colorum na van at 1 hindi nakarehistrong bus.
Ayon kay I-ACT STF Commander Col. Manuel Bonnevie, karamihan sa mga nahuli ay pawang private vehicles na ginagamit pang-biyahe at walang otorisasyon mula sa LTFRB.
Maliban dito, naniningil din sila ng sobrang taas na pamasahe.
Inisyuhan ng Inspection Report Summons (IRSs) ang driver at dinala sa LTFRB impounding sa Magalang, Pampanga ang mga sasakyan.
Mayroon ding isang driver na nabigong magpakita ng balidong driver’s license makaraang makumpiska noon ang kaniyang lisensya dahil sa traffic violation at hindi na niya ito kinuha. (D. Cargullo)
