Opisyal ng Comelec sa Northern Samar patay sa pamamaril

Nasawi ang acting Commission on Election (Comelec) officer sa Lope De Vega, Northern Samar makaraang barilin sa bayan ng Catarman.

Ayon sa inisyal na imbestigasyon ng pulisya, pauwi galing ng Comelec office si James Diaz Maghanoy, 42 anyos nang siya ay barilin nang hindi nakilalang suspek.

Naisugod pa sa ospital ang opisyal pero pumanaw din.

Mariin namang kinondena ng Comelec ang pamamaslang kay Maghanoy.

Sa pahayag nanawagan si Comelec Spokesperson James Jimenez sa mga otoridad nang masusing imbestigasyon sa krimen.

Si Maghanoy ay itinalaga bilang acting election officer sa bayan ng Lope De Vega noong buwan ng Abril. (DDC)