American national huli dahil sa bomb joke sa Tuguegarao Airport

Inaresto ang isang American national makaraang magbiro na may lamang bomba ang mga bagahe sa paliparan sa Tuguegarao City, Cagayan.

Kinilala ni PMaj. Junvie Velasco, hepe ng Tuguegarao City Police Airport, ang naaresto na si George Adrien Favarielle mula New Jersey, USA.

Sa impormasyon mula sa Cagayan Provincial Information Office, nagbiro ang dayuhan na may lamang bomba ang kanilang dalang bagahe habang sinisiyasat ito ng mga kawani ng Cebu Pacific.

Bagaman nagpaliwanag ang dayuhan na biro lamang ang kaniyang sinabi ay inaresto ito ng mga Airport Police at dinala sa himpilan ng Tuguegarao City PNP.

Ayon kay PMaj. Velasco, ang ginawang bomb joke ng banyaga ay paglabag sa Anti-Bomb Joke Law ng bansa at hindi maaaring palagpasin.

Kasama ng banyagang Amerikano ang kaniyang Pinay na asawa na tubong Gonzaga, Cagayan.

Umuwi sila ng Pilipinas kamakailan dahil nagdiwang ng kaarawan ng ina ni Pascua at pabalik na sana sila sa US.

P30,000 ang piyansa na kailangagn ilagak ng dayuhan para sa kaniyang paglaya. (DDC)