VP Leni Robredo naghain na ng kaniyang COC sa Comelec
Ilang oras matapos ang pormal na anunsyo ng kaniyang pagtakbo bilang pangulo ng bansa, naghain na ng kaniyang Certificate of Candidacy (COC) sa Commission on Elections (Comelec) si Vice President Leni Robredo.
Dumating sa Sofitel Philippine Plaza sa Pasay City si Robredo kasama ang kaniyang mga anak na sina Tricia at Aika.
Sa kaniyang naging talumpati nang pormal na ianunsyo ang kaniyang pagsabak sa presidential elections, sinabi ni Robredo a kailangang talunin ang luma at bulok na klase ng pulitika sa bansa.
Aminado rin si Robredo na hindi na niya ginusto noong una na sumabak sa presidential elections at ninais na lamang bumalik sa probinsya.
Kabilang sa makakalaban ni Robredo sa pang-panguluhang halalan si dating Senador Bongbong Marcos na noong 2016 vice presidential elections ay tinalo na ni Robredo. (DDC)
