Nasirang bahagi ng Topaz Road sa Ortigas, Pasig City hindi dahil sa liquifaction

Hindi fault o liquefaction ang dahilan ng pagkasira ng bahagi ng kalsada sa Topaz Road sa bahagi ng Ortigas Business District sa Pasig City.

Nagsagawa ng inspeksyon sa nasabing kalsada si Pasig City Mayor Vico Sotto, kasama ang mga kinatawan mula sa Pasig Engineering Department, -MGB, Phivolcs, Office of Civil Defense, MMDA at mga kinatawan mula sa Ortigas Land.

Kasunod ito ng pagkalat sa social media ng sirang bahagi ng Topaz Road at may mga post pa na liquefaction ang dahilan ng pagkasira ng kalsada.

Ayon kay Sotto, batay sa assessment ng kanilang engineering department, lahat ng gusali malapit sa lugar ay ligtas.

Mayroon aniyang sirang drainage line na nagresulta ng crack sa Topaz Road.

Kasama ding sinuri ang kalapit na excavation site kung saan tiniyak ng private contractor nito na gagawa ng mga hakbang para para maiwasan ang pagkakaroon ng soil erosion.

Apela ni Sotto sa publiko iwasan ang pagbabahagi ng mga peke at sensationalized post sa social media. (DDC)