133 tuning units sa main line ng MRT-3, napalitan na
Napalitan na ng pamunuan ng MRT-3 ang 133 tuning units sa main line, bilang bahagi ng malawakang rehabilitasyon ng linya.
Ang tuning unit ay bahagi ng isang track circuit, isang electrical system na siyang nagde-detect kung mayroong tren o walang tren sa isang track.
Mahalaga ito para sa maayos na signalling system, upang magarantiya kung ligtas nang patakbuhin ang isang tren sa railway track.
Mayroong 31 tuning units ang napalitan sa North Avenue station, 8 units sa Quezon Avenue station, 10 units sa GMA-Kamuning station, 13 units sa Cubao station, 12 units sa Ortigas station, 28 units sa Shaw Boulevard station, 8 units sa Boni Avenue station, 11 units sa Guadalupe station, at 12 units sa Buendia station.
Katuwang ng pamunuan ng MRT-3 sa malawakang rehabilitasyon ng rail line ang maintenance provider nito na Sumitomo-Mitsubishi Heavy Industries mula sa Japan.
