Moderna vaccines galing US para sa mahihirap ayon kay Pangulong Duterte
Siniguro ni Pangulong Rodrigo Duterte na makararating sa mga mahihirap na mamamayan ang donasyong bakuna ng Estados Unidos.
Personal na tinanggap ng pangulo ang tatlong milyong doses ng Moderna COVID-19 vaccines na dumating sa bansa noong Martes.
Sinabi ng pangulo na batid niya ang sentimyento ng mga Amerikano na ang dapat na unang makatanggap ng mga bakuna ay ang mga hindi kayang bumili ng sarili nilang bakuna.
Dahil dito sinabi ng pangulo na makakaasa ang Amerika na susundin ng Pilipinas ang direktibang ito.
Kasabay nito ay nagpasalamat ang pangulo sa pamahalaan ng US at sa COVAX Facility, sa mga suportang ipinagkaloob sa bansa, sa gitna ng COVID-19 pandemic. (Faith Dela Cruz)
