SP Sotto dalawang beses pinagtangkaang ikudeta

Kinumpirma ni Senador Panfilo ‘Ping’ Lacson na dalawang beses pinagtangkaang ikudeta si Senate President Vicente ‘Tito’ Sotto III bilang lider ng Senado.

Sinabi ni Lacson na ang pinakahuli ay dahil sa deklarasyon ni Sotto na kakandidato ito bilang Vice President sa 2022 Elections.

Ipinaliwanag ni Lacson na nakatanggap sila ng impormasyon na isang miyembro ng majority bloc ang nagpapaikot ng resolution at nangangalap ng lagda sa mga senador para patalsikin si Sotto.

Tumanggi naman si Lacson na tukuyin pa kung sino ang nasa likod ng pagtatangkang palitan si Sotto bilang Senate President.

Nanindigan naman si Lacson na kung makakakuha sila ng 13 lagda ay handa si Sotto na magbitiw.

Subalit hindi anya nagtagumpay ang pagtatangka dahil maganda ang palakad ni Sotto sa senado. (Dang Garcia)