Pagtuturok ng second dose ng Gamaleya vaccine sa Taguig City sinuspinde
Sinuspinde muna ang pagbibigay ng second dose ng Gamaleya vaccine ngayong Sabado, July 17 sa mga residente ng Taguig City.
Sa abiso ng Taguig City LGU, hindi muna maibibigay ang second dose para sa mga nauna nang naturukan ng Gamaleya noong June 21, 22, 23, at 24.
Tiniyak naman ng LGU na maari pa ring ibigay ang second dose kahit lumagpas sa petsang nakasulat sa vaccination card.
Batay kasi sa guidelines ng Department of Health (DOH), acceptable pa kahit tumagal ng 3 o hanggang 6 na buwan ang pagitan ng unang dose sa ikalawang dose ng bakuna.
Pinayuhan ang mga nakatanggap ng unang dose ng Gamaleya na mag-antabay sa susunod na abiso ng LGU.
