12 pulis at Brgy. Kagawad ipinatawag ng DOJ kaugnay sa pagpatay sa anim na tao sa San Jose Del Monte, Bulacan
Pahaharapin sa preliminary investigation ng Department of Justice ang 12 pulis at isang Barangay Kagawad na isinasangkot sa pagdukot at pagpatay sa anim na tao sa San Jose Del Monte Bulacan
Ito ay matapos na pormal ng isinampa ng National Bureau of Investigation ang mga kasong kriminal laban kina Police Staff Sergeant Benjie De Castro Enconado; Jayson Morales Legaspi; Irwin Joy Morfe Yuson; Edmund Villamar Catubay Jr, mga Police Corporal na sina Jay Marc Mabasa Leoncio; Herbert Linoy Hernandez; Raymond Babida Bayan; Paul Jimenez Malgapo at mga patrolman na sina Erwin Oplimo Sabido at Rusco Virnar Madla.
Lumitaw sa imbestigasyon ng NBI na February 13, 2020 nung dinukot ng mga pulis sina Edmar Asprin at Richard Salgado; Edwin Mergal at Jim Joshua Cordero; Chamberlain Domingo at Chadwin Santos sa Towerville, Barangay Sto Cristo, San Jose Del Monte Bulacan na isinakay sa kulay puting van.
February 14, 15 at 18 naman ay patay na nang matagpuan ang mga biktima sa tatlong magkakahiwalay na lugar sa sa San Jose.
Depensa ng mga pulis na nanlaban ang mga biktima pero base sa mga ebidensiyang nakalap ng NBI ay sadyang pinatay ang mga biktima.
