6 patay sa pagbagsak ng Blackhawk helicopter ng Philippine Air Force sa Pampanga

Kinumpirma ng Department of National Defense na anim ang nasawi sa pagbagsak ng Blackhawk helicopter na pag-aari ng Philippine Air Force.

Sa pahayag nagpaabot ng pakikiramay si Defense Secretary Delfin Lorenzana sa naulilang pamilya ng tatlong piloto at tatlong airmen na nasawi sa chopper crash.

Lulan sila ng S-70i Blackhawk helicopter nang bumagsak ito sa bahagi ng Crow Valley malapit sa Clark Air Base, Pampanga.

Nagsasagawa ng proficiency flight ang anim nang mangyari ang insidente Miyerkules, June 23 ng gabi.

Ayon kay Lorenzana, grounded muna ang lahat ng Blackhawk fleet habang nagsasagawa ng imbestigasyon sa nangyari. (Dona Dominguez-Cargullo)