PNP nakapagtala ng isa pang pulis na pumanaw sa COVID-19

Naitala ng Philippine National Police (PNP) ang ika-53 pulis na nasawi dahil sa COVID-19.

Ayon kay Police General Debold M. Sinas, ang pinakahuling nasawi ay isang 54 anyos na lalaking Police Lieutenant na nakatalaga sa Camp Crame.

Naospital ang naturang pulis noong April 14 dahil sa COVID-19.

Sumailalim ito sa Hemoperfusion procedure para malinis ang kaniyang dugo.

Noong April 21 hanggang 23 ay isasailalim dapat sa hemodialysis ang nasabing pulis pero hindi ito naisakatuparan dahil sa unstable na blood pressure niya at mababang oxygen level.

Araw ng Sabado, April 24 nang pumanaw ang pulis.

Nagpaabot naman si Sinas ng pakikiramay sa mga naulila ng pulis.

Hanggang noong April 24, 2021 ang PNP Health Service ay nakapagtala ng 141 na bagong kaso ng COVID-19.

Sa kabuuan ay umabot na sa 19,536 ang COVID-19 infection sa PNP at 2, 065 dito ang active cases.