Limang pasahero ng lumubog na motorbanca sa Mati City nailigtas ng Coast Guard

Nailigtas ng mga tauhan ng Philippine Coast Guard (PCG) Station Davao Oriental at Special Operations Unit – Southeastern Mindanao ang limang pasahero ng isang motorbanca matapos itong lumubog sa karagatang sakop ng Pujada Bay, Mati City.

Ayon sa PCG, ang motorbanca ay umalis sa Barangay Macabol, Mati City, Davao Oriental at patungo dapat sa Vanishing Island sa Davao del Norte nang ito ay hampasin ng malalaking alon.

Agad nagtalaga ng search and rescue (SAR) team ang PCG matapos makatanggap ng distress call mula sa isa sa mga pasahero.

Nailigtas naman lahat ng pasahero na pawang isinailalim sa medical check-up ng mga tauhan ng Mati City Disaster Risk Reduction and Management Office (CDRRMO).

Pawang maayos naman ang kondisyon ng lima na agad ding naihatid sa kani-kanilang mga lugar.