PBBM: Mga TESDA graduate, handang bumuo ng mas magandang kinabukasan para sa sarili at pamilya
Hinimok ni Pangulong Ferdinand “Bongbong” Marcos Jr. ang mga bagong graduate ng Technical Education and Skills Development Authority (TESDA) sa Ilocos Norte na gamitin ang kanilang mga bagong natutuhang kasanayan at sertipikasyon upang makamit ang mas magagandang oportunidad, makapagtayo ng sariling kabuhayan, at makatulong sa paglago ng ekonomiya ng bansa.
Sa kanyang talumpati sa harap ng 1,150 graduate sa isinagawang mass graduation ceremony sa Ilocos Norte National High School Gymnasium noong nakaraang linggo, binigyang-diin ni Pangulong Marcos ang pangako ng pamahalaan na pagtuunan ng pansin ang pagpapalakas sa kasanayan at kakayahan ng mga Pilipino bilang daan tungo sa mas maunlad na buhay at mas matatag na mga komunidad.
“Kapag namumuhunan tayo sa kakayahan ng Pilipino, namumuhunan tayo sa mas matatag na pamilya, mas masiglang ekonomiya, at mas magandang kinabukasan ng bansa,” ani Pangulong Marcos.
Kasabay nito, binati ni PBBM ang mga graduate at binigyang-diin na ang kanilang pagtatapos sa technical vocational education and training (TVET) ay hindi lamang pagtatapos ng kanilang pagsisikap kundi simula rin ng mga bagong oportunidad.
“Ngunit, ito rin ang panimula ng isang maliwanag na kinabukasan dahil mayroon na kayong kakayahan,” aniya.
Nagmula ang mga graduate sa 23 TESDA-accredited institutions sa Ilocos Norte. Sa kabuuan, 800 ang nagtapos sa iba’t ibang tech-voc course sa ilalim ng Training for Work Scholarship Program at Special Training for Employment Program; 325 naman ang nakatapos ng Early Childhood Care and Development Services NC III; habang 25 ang nagtapos sa ilalim ng Enterprise-Based Education and Training Program.
Kabilang sa mga kwalipikasyong natapos ng mga graduate ang Dressmaking NC II, Barista NC II, Cookery NC II, Bread and Pastry Production NC II, Heavy Equipment Operation, Shielded Metal Arc Welding, Computer Systems Servicing NC II, Agricultural Crops Production, at iba pang programang nakaayon sa pangangailangan ng industriya at mga komunidad.
Binigyang-diin din ni Pangulong Marcos na ang TVET ay hindi lamang nagbubukas ng mga oportunidad para sa trabaho kundi maging para sa pagnenegosyo. Binanggit niya ang mga TESDA graduate na nakapagtayo ng sarili nilang negosyo at nakalikha ng mga trabaho para sa kapwa Pilipino.
“Patunay ito na bawat isa sa inyo ay maaaring maging susunod na boss ng sarili ninyong negosyo, ng sarili ninyong mga kompanya,” ani Pangulong Marcos.
Samantala, binati ni TESDA Secretary Kiko Benitez ang mga graduate sa matagumpay nilang pagtatapos ng training at, para sa mga nakapasa sa competency assessment, sa pagkamit ng kanilang National Certificates.
Para sa kalihim ng TESDA, higit pa sa pagtatapos ng training ang ibig sabihin ng graduation. Patunay din ito ng tiyaga, determinasyon, at kahandaan ng mga graduate na harapin ang mundo ng trabaho.
“[Tech-voc] builds skills, it helps us reach our potential, and it breeds excellence. Tech-voc is the shortest runway to employment, promising changed lives in a short amount of time. Thus, tech-voc helps build the nation, ”ayon kay Sec Kiko Benitez.
“Ngayon, you are not just TESDA graduates, but you are ambassadors of education, of tech-voc education, of lifelong learning,” dagdag pa niya.
Dumalo rin sa seremonya sina DSWD Secretary Rex Gatchalian; Ilocos Norte 1st District Representative Sandro Marcos; Ilocos Norte 2nd District Representative Angelo Barba; Ilocos Norte Governor Cecilia Araneta Marcos; mga pinuno ng lokal na pamahalaan mula sa iba’t ibang bahagi ng lalawigan; at iba pang mga kilalang panauhin. (Bhelle Gamboa)
