Mga dayuhan binalaan sa mga pekeng BI agents

Binalaan ng Bureau of Immigration ang mga dayuhan laban sa mga nagpapanggab na BI agents at nagkakasa ng hindi otorisadong inspeksyon at operasyon.

Ayon kay BI Commissioner Joel Anthony Viado, nakatanggap sila ng report na may mga nakikipag-usap sa mga dayuhan ay sinasabing sila ay ahente ng BI.

Gumagamit umano ang mga ito ng pekeng dokumento para makapagsagawa sila ng inspeksyon at immigration checks.

Ani Viado, tanging ang mga otorisadong immigration personnel lamang na may bitbit na balidong mission orders na pirmado ng BI Commissioner ang pinapayagang magsagawa ng immigration enforcement operations.

Paalala ng ahensya, dapat maging maingat ang mga dayuhan at tiyaking mabeberipika ang pagkakakilanlan ng mga nagpapakilang immigration officer. (DDC)