6 na buwang renta sa bahay ng mga nasunugan sa QC sinagot ng DSWD

Namahagi ang Department of Social Welfare and Development ng transitory shelter assistance sa mga residente sa NIA Road sa Quezon City na nawalan ng tirahan matapos masunugan.

Ito ay sa ilalim ng Pag-abot Program ng ahensya sa pakikipagtulungan sa Quezon City LGU.

Ayon kay DSWD Pag-Abot Program OIC Marilyn Moral, binigyan ng tulong pinansyal ang mga apektadong pamilya na magagamit nila para pang-renta ng bahay sa loob ng anim na buwan.

Sinabi ni Moral na sa ilalim ng programa, tinutulungan ng ahensya ang mga nakararanas ng extreme critical conditions at kasama dito ang mga nasunugan, naapektuhan ng lindol at iba pang uri ng kondisyon.

Target ng DSWD na masakop ng nasabing programa ang dalawang libong pamilya na naapektuhan ng sunog. (DDC)