Higit 4,900 violators nahuli ng SPD sa isinagawang district-wide synchronized Oplan Bulabog
Para sa sabay-sabay na hakbang sa paghihigpit ng disiplina sa komunidad at pagandahin ang seguridad ng mamamayan, nagsagawa ang Southern Police District ng “District-Wide Synchronized Oplan Bulabog” at nagpatupad ng mga lokal na ordinansa sa mga lungsod ng Makati, Taguig, Pasay, Muntinlupa, Las Piñas, Parañaque at bayan ng Pateros.
Nakatuon ang ganitong tactical deployment sa malakas na pagpapatupad ng city ordinances sa Southern Metro, sa pinagsamang operasyon ng pulisya at barangay na sinimulan alas- 8:00 ng umaga ng Martes hanggang madaling araw ngayong Miyerkules.
Sa ilalim ng istratihikong direksiyon ni Col. Glenn Oliver C. Cinco,
Acting District Director ng SPD, nasa 439 na police personnel ang pinakilos sa operasyon at 255 force multipliers kabilang ang mga Barangay tanod upang tiyakin ang komprehensibong hakbang ng Distrito.Ang joint forces ay nakatutok sa kahinahunan ng publiko, curfew hours ng menor-de-edad, at pagpapanatili ng integridad ng publiko sa pamamagitan ng istriktong implementasyon ng “MaTaPatPaMuLaPa” city ordinances at regulations.
Ang pagtutulungan sa pagitan ng mga pulis at komunidad ay nagresulta ng pagkatala ng kabuuang 4,972 na lumabag sa iba’t ibang kategorya ng paglabag.
Nanguna rito ang pag-inom ng alak at paninigarilyo sa pampublikong lugar na umabot sa 1,745 violators, sinundan ng 1,020 na indibiduwal ang nahuling umiihi sa lansangan, nagkakalat o nagtatapon ng basura kung saan-saan.Umabot sa 806 minors ang lumabag sa curfew hours at 783 na indibiduwal ang nahuli habang walang suot na pang-itaas na damit sa kalye. Ang iba pang paglabag na naitala ay ang 271 na gumagamit ng karaoke sa dis-oras ng gabi, 239 na kaso ng ilegal na istraktura at mga sagabal sa ilalim ng road clearing, 58 ang hinuli sa gawaing bandalismo, 26 ang lumabag sa City Ordinance Traffic Code, at 24 naman sa iba pang miscellaneous violations.
Pinapanatili ng SPD ang balanseng diskarte ng ganitong mga panghuhuli, pagprayoridad ng edukasyon at disiplina kaysa sa istriktong pagpaparusa.
Ayon sa SPD ang kabuuang 4,886 na indibiduwal ay binigyan ng warning at pinalaya rin habang 86 naman ang naisyuhan ng mga multa.Walang pormal na kaso ang naisampa dahil sumasalamin ang operasyon sa agarang pagwawasto ng aksyon at iangat ang kamalayan ng komunidad.
Sa pagtugon sa mga paglabag sa lokal na ordinansa sa tulong ng pinagsama-samang hakbang, muling tiniyak ni Col Cinco ang pananagutan ng SPD na panatilihin ang kaligtasan, kaayusan at disiplinadong Southern Metro Manila. (Bhelle Gamboa)
