7 pumping stations sa Metro Manila ininspeksyon ng MMDA

Ininspeksyon ng Metropolitan Manila Development Authority (MMDA) ang pitong pumping stations sa Metro Manila bilang paghahanda ng ahensiya sa nalalapit na panahon ng tag-ulan.

Pinangunahan nina Assistant General Manager for Operations Asec. David Angelo Vargas at Flood Control Sewerage Management Office OIC Engineer Michael Doce ang pag-inspeksyon sa Libertad, Aviles, Pandacan, San Andres, Sta. Clara, Makati, at San Francisco pumping stations upang matiyak na handa ang mga ito bago ang tag-ulan.

Sinuri ng mga opisyal ang operasyunal na kahandaan ng mga makina, pumping capacity, at kondisyon ng drainage systems sa bawat pasilidad.

Layunin ng inspeksyon ang agarang pagtugon sa posibleng epekto ng ulan. Bahagi ang inspeksyon ng tuloy-tuloy na pagsisikap ng ahensiya na mapanatiling malinis at maayos ang mga daluyan ng tubig para makaiwas sa banta ng pagbaha.

Kasabay nito, patuloy din pinaiigting ng ahensiya ang paglilinis, desilting, at maintenance cleanup ng mga daluyang tubig upang maiwasan ang pagbabara at mapabilis ang daloy ng tubig dito.

Ang mga pumping stations ay mahalagang bahagi ng flood control system ng Metro Manila, na nagsisilbing pangunahing mekanismo sa mabilis na pag-alis ng tubig-baha mula sa mga lansangan at mabababang lugar papunta sa mga ilog at estero. Sa pamamagitan nito, mababawasan ang panganib dulot ng malakas na buhos ng ulan. (Bhelle Gamboa)