Unified legal service para sa kuwalipikadong PDLs pinagtibay ng BuCor at IBP

Nilagdaan sa pagitan ng Bureau of Corrections at Integrated Bar of the Philippines (IBP) ang isang Memorandum of Agreement (MOA) para sa implementasyon ng Unified Legal Service ng mga kuwalipikadong persons deprived of liberty (PDLs) na nasa kustodiya ng Bucor.

Ang naturang MOA ay pinirmahan nina Bucor Director General Gregorio Pio P. Catapang Jr. at IBP National President, Atty. Allan G. Panolong sa ginanap na simpleng seremonya sa New Conference Room ng Bucor sa Muntinlupa City.

Ayon kay Catapang, layunin ng MOA na isulong ang akses sa hustisya o katarungan at proteksiyong legal ng PDL, magbigay ng mga remedyong naaayon sa batas upang makatulong na mapababa ang sentensiya at mapaluwag ang mga kulungan gayundin ang pagtatag ng tulong ng mga serbisyong legal sa mga pasilidad ng Bucor.

Sa ilalim ng partnership, mag-aalok ang IBP ng malawak na legal services na walang katulad na kailangan ng PDLs. Ang ganitong mga serbisyo ay kinabibilangan ng representasyon at payo ng mga pag-aapela at post-conviction remedies, gayundin ang pagtulong sa mga petisyon para mapababa ang hatol, pardon, parole, at executive clemency.

Susuportahan din ng IBP ang mga PDL sa paghahaon ng mga petisyon para sa habeas corpus at iba pang extraordinary writs upang tiyaking makilala at marerespeto ang kanilang mga karapatang naaayon sa batas.

Saklaw din ng kasunduan ang mga aplikasyong may kinalaman sa good conduct time allowances (GCTA),preventive imprisonment credit, at time allowances para sa mga aktibidad gaya ng pag-aaral, pagtuturo at pagmementor sa loob ng mga pasilidad.Dagdag pa rito ang iba pang alalahaning legal na tumataas habang nakakulong na tutugunan naman ng legal aid services ng IBP.

Maliban sa pagsisilbi sa populasyon ng PDL, binibigyang halaga ng MOA ang mga hakbanging magpapaunlad sa kapasidad ng mga empleyado ng BuCor.

Sinabi ni Panolong na ang ganitong MOA ay magpapatunay na ang batas ay armas ng mga mahihirap at mahihina kung saan ninanais ng IBP na magbigay ng mga serbisyo sa publiko lalo na sa mga kinakapus sa buhay.

“Ito ang patunay na sa Pilipinas, ang hustisya ay umiiral at makatarungan,” pahayag ni Panolong. (Bhelle Gamboa)