DOTr pinatutugis ang mga PUV na nananamantala sa singil sa pasahe

Nagbabala ang Department of Transportation sa mga driver ng pampublikong sasakyan na nananamantala sa mga pasahero at naniningil ng mataas na halaga ng pamasahe.

Ginawa ni Transportation Secretary Giovanni Lopez ang babala kasunod ng isang post na nag-viral sa social media kung saan ilang turistang Taiwanese ang siningil umano ng nine thousand six hundred pesos na pamasahe mula sa NAIA patungo sa kanilang destinasyon sa Maynila sa halip na five hundred pesos lamang.

Inatasan ni Lopez ang Land Transportation Franchising and Regulatory Board at ang Land Transportation Office na hulihin ang sinomang drayber na mahuhuling nanloloko at nananamantala sa mga pasahero.

Ang mga mapatutunayang naninigil ng sobra-sobra ay maaaring mapatawan ng pagsuspinde o pagkansela ng prangkisa.

Inatasan din ni Lopez ang LTFRB na sampahan ng kasong kriminal ang mga mahuhuling nananamantala. (DDC)