Sen. Tulfo nanawagan ng Recovery Plan para sa mga OFW na stranded sa airport

Umapela si Senate Foreign Relations Panel Chairman Erwin Tulfo sa Department of Migrant Workers at Overseas Workers Welfare Administration na maglatag na ng recovery plan para sa mga Pilipinong nakatakda na sanang bumiyahe patungong Middle East upang magtrabaho.

Ayon sa senador, maliban sa tulong sa mga Pinoy na naiipit sa gulo sa mga bansang apektado ng airstrikes sa kailangan ding bigyan ng pansin ang mga Pilipinong papunta pa lamang sana sa ibang bansa upang magtrabaho, ngunit hindi makaalis sa Pilipinas dahil sa mga nakanselang biyahe.

Iminungkahi ni Tulfo ang paggamit ng two billion pesos na na halaga ng AKSYON Fund o “Agarang Kalinga at Saklolo para sa mga OFWs na Nangangailangan”.

Maliban sa tulong pinansyal, sinabi ng senador na dapat ding matutukan ang epekto nito sa kanilang mental health.

Tiniyak naman ni Tulfo na patuloy ang pakikipag-ugnayan ng kaniyang tanggapan sa Department of Foreign Affairs at sa DMW.

Kabilang sa pinaghahandaan ang pagpapatupad ng immediate repatriation plans para sa mga Pinoy sa apektadong mga ibang bansa na nais nang umuwi ng Pilipinas. (DDC)