Embahada ng Pilipinas tiniyak ang tulong sa Pinay na pinagsisipa ng isang lalaki sa mall

Tiniyak ng Philippine Embassy sa Singapore ang pagbibigay ng tulong sa isang Pinay na sinaktan umano ng isang lalaki sa isang mall.

Ayon sa embahada, batay sa kumakalat na video online nangyari ang insidente noong February 8.

Hindi pa umano tukoy ang citizenship ng lalaking sangkot sa video.

Sinabi ng embahada na sa tulong ng Migrant Workers Office at ng Overseas Workers Welfare Administration ay nakausap na nila ang Pinay at pinagkakalooban na ito ng tulong.

Patuloy ding babantayan ang sitwasyon at mananatili ang ugnayan sa biktima pero tumanggi na ang embahada na ilahad ang iba pang detalye at dahilan ng insidente.

Sa viral video, makikitang pinagsisipa ng lalaki ang Pinay sa loob ng isang mall. (Dona Dominguez-Cargullo)