Online shopping platforms ipinatawag ng CICC dahil sa talamak na bentahan ng fertilizer online

Pinulong ng Cybercrime Investigation and Coordinating Center at ng Fertilizer and Pesticide Authority ang mga kinatawan ng iba’t ibang Online Shopping Platform matapos ang sunud-sunod na pagkaka-aresto sa mga ilegal na nagbebenta ng fertilizers online.

Kabilang sa ipinatawag ang mga kinatawan ng Shopee, Lazada, at TikTok para talakayin ang mahigpit na pagbabawal na maibenta online ang anumang uri ng fertilizers at pesticides.

Sa operasyon kamakailan, apat na unregistered sellers ang dinakip sa Quezon City kung saan nakumpiska sa kanila ang two hundred seventy-six na illegal products.

Sa ilalim ng FPA Memorandum Circular Number 1, mahigpit na ipinagbabawal ang pagbebenta ng fertilizers at pesticides sa lahat ng online marketplaces dahil ang kemikal na taglay nito ay maaaring magdulot ng banta sa kalusugan.

Paalala ng CICC sa mga Online Shopping platforms, magpatupad ng “self-regulation” para ma-auto block ang mga listing para sa fertilizers at pesticides bilang proteksyon na din sa agricultural sector at para maawat ang paglaganap ng counterfeit chemicals. (DDC)