Fire Volunteer nagsampa na ng reklamo laban sa nakaalitang pulis sa away-trapiko

Pormal nang inireklamo sa NAPOLCOM ang nag-viral na pulis-Marikina matapos na may makaalitan na fire truck driver sa kalsada.

Ayon sa NAPOLCOM, inihain ng fire volunteer na si Earl Joseph Lantin ang reklamo laban kay Police Staff Sergeant Michelle Ram De La Paz.

Pero bago ang paghahain ng reklamo sinabi ni NAPOLCOM Chief, Commissioner Ralph Calinisan na nagsagawa na din ng motu proprio investigation ang ahensya matapos kumalat ang video ng umano ay pagharang ng kotse ng pulis sa fire truck.

Si De La Paz ay nauna nang inalis sa pwesto at inilagay sa Holding Unit ng Marikina Police Headquarters Support Service.

Ayon kay Calinisan non-negotiable para sa mga pulis ang pagrespeto sa mga sibilyan at mga kapwa- public servants. (DDC)