FDA nakatutok sa recall sa dalawang brand ng infant formula milk

Masusing binabantayan ng Food and Drug Administration ang pagbawi sa merkado ng dalawang produkto ng infant formula milk dahil sa potensyal na safety at quality concern.

Nagpatupad ng voluntary recall ang kumpanyang Nestlé Philippines sa partikular na mga batch ng NAN OPTIPRO at NANKID OPTIPRO na parehong gatas na pang-sanggol dahil sa isyu sa raw materials na mula sa isang third party supplier.

Ayon sa FDA, sa ngayon wala pa itong natatanggap na anumang report na may naapektuhan o may batang nagkasakit dahil sa mga produkto.

Pero sa kabila nito, sinabi ng FDA na suportado nito ang ipinatupad na hakbang ng Nestlé para maprotektahan ang kalusugan ng publiko lalo na ang mga sanggol.

Paalala ng FDA sa mga consumer, tingnang mabuti ang product batch numbers ng gatas ng kanilang anak at kung kabilang ito sa apektado ng recall ay huwag na itong gamitin.

Nakikipag-ugnayan na ang FDA sa manufacturer ng apektadong produkto para matiyak ang agaran at kumpletong recall sa lahat ng physical at online retail outlets. (DDC)