Ramon Ang walang balak pumasok sa pulitika

Isinantabi ng negosyanteng si Ramon Ang ang mga pinalulutang na siya ang nais ipalit bilang “consensus caretaker” sa gobyerno ngayong balot ng isyu ng korapsyon ang Marcos administration.

Ayon kay Ang, nakarating na sa kaniya ang mga balita at marami na din ang nagpapadala sa kaniya ng mensahe.

Para tuldukan ang isyu, sinabi ni Ramon Ang na hindi niya papasukin ang pulitika.

Aniya, naniniwala siyang mas makakapag-ambag siya sa bansa sa pamamagitan ng pananatili bilang negosyante, pagbuo ng mga proyekto, at pagsuporta sa gobyerno at komunidad.

Sinabi ni Ang na nahaharap ngayon ang bansa sa maraming pagsubok at nakalulungkot na may mga nagnanais na resolbahin ito sa mabilisang pamamaraan.

Ayon kay Ramon Ang, mananatili siyang “dependable partner” sa pagpapaunlad ng bansa.

Hinikayat din nito ang lahat na magkaisa na lamang para sa ikabubuti ng Pilipinas. (Dona Dominguez-Cargullo)