Oplan Kontra Baha inilunsad, Las Piñas kaagapay sa malinis at ligtas na Metro Manila

Sa mas maigting na kampanya ng pamahalaan para labanan ang pagbaha, dumalo si Las Piñas City Mayor April Aguilar at Congressman Mark Anthony Santos sa paglunsad ng “Oplan Kontra Baha: Greater Metro Manila Waterways Clearing and Cleaning Operations” na pinangunahan ni Pangulong Ferdinand “Bongbong” Marcos Jr. sa Balihatar Creek, Barangay San Dionisio, Parañaque City ngayong Miyerkules, Nobyembre 12, 2025.

Sumama sa isinagawang inspeksyon sina San Miguel Corporation (SMC) CEO Ramon Ang, Metropolitan Manila Developmemt Authority (MMDA) Chairman Atty. Romando Artes, MPIC Chairman Manny V. Pangilinan, at Department of Public Works and Highways (DPWH) Secretary Vince Dizon.

Kasama rin ni Mayor April ang iba pang local chief executives bilang bahagi ng Metro Manila Council, na katuwang ng MMDA sa pagpapatupad ng mga proyekto.

Nakatuon ang naturang programa sa paglilinis at pagbubukas ng mga estero, ilog, at drainage systems upang maiwasan ang pagbaha sa kalakhang Maynila—lalo na matapos ang pagdaan ng bagyong #TinoPH at #UwanPH. Saklaw nito ang higit 142 kilometrong mga daluyan ng tubig at mahigit 333 kilometrong drainage systems sa buong Metro Manila.

Binigyang-diin at tiniyak ni Mayor April na buo ang suporta ng Las Piñas sa mga hakbang ng pamahalaan para sa resilient at disaster-ready na Metro Manila. (Bhelle Gamboa)