Impormasyon tungkol sa 2 Super Typhoon na tatama sa bansa, hindi beripikado – PAGASA

Hindi opisyal at hindi beripikado ang ipinakakalat na impormasyon na may dalawang Super Typhoon na tatama sa Luzon at Visayas sa Nobyembre.

Sa inilabas na pahayag ng weather bureau, kung pagbabasehan ang Tropical Cyclone Threat Potential Forecast, may posibilidad na may mabuo na bagyo sa labas ng bansa hanggang bago mag-Nov. 2, at may posibilidad na tumawid ito sa bansa sa susunod na linggo o sa pagitan ng Nov. 3 hanggang 9.

At dahil ang forecast na ito ay nasa loob pa ng two weeks period, nananatiling mataas ang uncertainty o hindi pa tiyak ang mga detalye nito lalo na ang patungkol sa direksyon at posibleng lakas ng bagyo.

Batay rin sa climatology ng mga bagyong dumaraan sa Pilipinas tuwing buwan ng Nobyembre, karaniwang kumikilos ang mga bagyo pa-kanluran at madalas na nakaapekto sa Southern Luzon at Visayas.

Paalala ng PAGASA sa publiko, maging maingat sa pagbabahagi ng mga impormasyon lalo na kung hindi opisyal o beripikado ang pinagmulan nito. (DDC)