Biktima ng ‘Talon Modus’ naharang ng BI

Napigilan ng Bureau of Immigration ang pag-alis sa bansa ng isang babaeng biktima ng trafficking.

Ayon kay BI Commissioner Joel Anthony Viado, ang bitkima ay aalis sana ng bansa gamit ang pekeng travel itinerary para ilegal na magtrabaho sa Thailand.

Sa panayam sa kaniya ng Immigration authorities, sinabi ng pasahero na bibiyahe siya patungong Hongkong.

Pero kalaunan inamin din nitong may nag-recruit sa kaniya para magtrabaho bilang Customer Service Representative sa Thailand at pinangakuan na susweldo ng 50,000 pesos kada buwan.

Paniwala ng BI, pagtatrabahuhin sa scam hub ang biktima.

Ayon kay Viado, isa itong halimbawa ng ‘Talon Modus,’ kung saan pinapaalis ang biktima bilang turista patungo sa isang bansa at pagkatapos ay lilipat sa orihinal nitong destinasyon. (DDC)