Disqualification ng Comelec kay Erice ibinasura ng SC

Ibinasura ng Korte Suprema ang disqualification laban kay Caloocan City 2nd District Rep. Edgar Erice.

Sa desisyon ng Supreme Court en banc binaligtad ang naunang pasya ng Comelec na nag-disqualify kay Erice dahil sa paglabag umano sa Omnibus Election Code dahil sa pagpapakalat ng mali o nakaaalarmang impormasyon sa proseso ng halalan.

Ayon sa SC, sa ilalim ng batas, maaaring ma-disqualify ang isang kandidato kung may pinal na desisyon mula sa hukuman na nagpapatunay na siya ay nagkasala sa isang election offense.

Bagaman may kapangyarihan ang Comelec na magsagawa ng imbestigasyon, ang pagtukoy kung guilty nga sa election offense si Erice ay dapat sa tamang forum ginawa at ito ang Regional Trial Courts.

Ayon pa sa SC, ang pagbabawal sa pagpapakalat ng maling impormasyon ay hindi kabilang sa mga batayan ng disqualification sa ilalim ng Section 68 ng OEC.

Sa naging pasya ng Mataas na Hukuman ay hindi tinalakay kung nagkasala nga ba si Erice, pero nilinaw na maituturing na paglabag kung ang isang tao ay nagkakalat ng maling impormasyon patungkol sa eleksyon na maaaring magresulta sa kaguluhan o kalituhan ng mga botante. (DDC)