Las Piñas LGU at Aivee Group nagsagawa ng ‘Aivee Beyond Borders’ Free Medical Mission

Matagumpay na naisagawa ng Pamahalaang Lungsod ng Las Piñas sa pamumuno ni Mayor April Aguilar sa partnership nito sa The Aivee Group ang Aivee Beyond Borders Medical Mission upang bigyan ng libreng mga serbisyong medikal ang 1,000 na Las Piñeros sa Philam Life Covered Court sa Barangay Pamplona Dos.

Ang kaganapang ito ay dinaluhan nina Mayor April Aguilar, Vice Mayor Mel Aguilar, Representative Mark Anthony Santos, at Councilor Alelee Aguilar kasama ang espesyal na panauhin na si Kylie Versoza.Nagpunta rin sa okasyon sina Brgy. Captain Robert Villalon ng Pamplona Dos, miyembro ng barangay council, BFRV HOA President Euan Toralballa, at Philam Life HOA President Arnel Aranas kasama ang mga opisyal at directors ng homeowners’ association.

Taos-pusong pinasalamatan ni Mayor April ang The Aivee Group sa pagdadala ng kanilang flagship health and wellness program sa Las Piñas at binigyang-diin ang patuloy na partnership ng lungsod sa pagsusulong ng accessible na alagang pangkalusugan at kapakanan ng bawat Las Piñero.

Ipinaabot din ng alkalde ang buong pusong pasasalamat sa Aivee Beyond Borders (ABB) team na binubuo ng mga doctors, surgeons, nurses, management staff, at Aivee ambassadors para sa kanilang malasakit at serbisyo. Hindi rin kinalimutan ni Mayor April na pasalamatan ang City Health Office na pinamumunuan ni Dr. Julie Gonzalez kasama ang mga LGU doctors at KALIPI volunteers sa kanilang suporta na siguruhin ang tagumpay ng medical mission. (Bhelle Gamboa)