P8M na halaga ng tulong mula Muntinlupa natanggap na ng Cebu

Bilang pakikiisa at pagpapakita ng malasakit, opisyal nang naipagkaloob ng Pamahalaang Lungsod ng Muntinlupa sa pangunguna ni Mayor Ruffy Biazon ang ₱8 milyong financial assistance para sa mga bayan sa Cebu na naapektuhan ng 6.9 magnitude na lindol.

Personal na inihatid ang humanitarian aid noong October 7, 2025 nina Mrs. Trina Biazon kasama sina Konsehal Atty. Alexson Diaz at Konsehal Walter Arcilla kasama pati na rin ang ilang department heads. Binisita nila ang mga lokal na pamahalaan ng Bogo City, Bantayan, San Remigio, Daanbantayan, Tuburan, Medellin, at Tabogon.

Ang emergency allocation na ito ay bahagi ng commitment ng Muntinlupa sa bayanihan at inter-LGU cooperation sa oras ng trahedya. “Hindi lang tayo para sa Muntinlupa. Sa panahon ng sakuna, ang puso ng bawat Muntinlupeño ay para sa buong Pilipinas,” ani Mayor Biazon.

Kasabay ng financial aid, nagpadala rin ang Department of Disaster Resilience and Management (DDRM) ng specialized rescue at medical team para tumulong sa ground operations sa Cebu—trained sa rapid deployment at trauma response.

Umalis ang rescue team noong October 2 dala ang mga essential medical supplies, portable equipment, at communication tools para sa mas maayos na koordinasyon sa mga local responders.

Ang inisyatibong ito ay patunay ng malasakit at responsive leadership ng Muntinlupa—isang lungsod na handang tumindig para sa kapwa, lalo na sa panahon ng sakuna. (Bhelle Gamboa)