Suspek timbog sa pagbebenta ng P15.5M na halaga ng pekeng DSWD relief goods

Sinalakay ng mga tauhan ng PNP-CIDG katuwang ang Department of Social Welfare and Development ang siang warehouse sa Tondo, Maynila na nagresulta sa pagkakaaresto ng isang babaeng suspek na sangkot umano sa pagbebenta ng pekeng relief goods.

Isinagawa ang operasyon base sa report ng ahensya na ang suspek na si alyas “Janice” ay sangkot umano sa pagbebenta ng kahon-kahong “DSWD Family Kit” relief goods na may markings na “Not for Sale.”

Nakumpiska sa warehouse ang 6,000 kahon na tinatayang nagkakahalaga ng mahigit 15.5 million pesos.

Ayon sa DSWD, ang mga nadiskubreng produkto sa warehouse ay hindi galing o hindi pag-aari ng ahensya at wala ring kinalaman ang ahensya sa operasyon ng warehouse.

Kinondena ng DSWD ang hindi otorisadong paggamit ng kanilang official logo.

Mahaharap ang suspek sa paglabag sa Republic Act 10121 o Philippine Disaster Risk Reduction and Management Act of 2010 at Illegal Use of Insignia sa ilalim ng Revised Penal Code. (DDC)