Bagong bagyo papasok sa bansa ngayong araw, papangalanang Opong

Nabuo bilang tropical depression ang Low Pressure Area na binabantayan ng PAGASA sa Silangan ng Southern Luzon.

Ayon sa PAGASA ang bagyo ay nasa labas pa ng bansa at huling namataan sa layong 1,075 kilometers East ng Eastern Visayas.

Taglay nito ang lakas ng hangin na aabot sa 55 kilometers bawat oras malapit sa gitna at pagbugsong aabot sa 70 kilometers bawat oras.

Kumikilos ang bagyo sa bilis na 35 kilometers bawat oras sa direksyong pa-kanluran.

Ayon sa PAGASA, ngayong hapon o gabi ay inaasahang papasok ito sa loob ng Philippine Area of Responsibility at papangalanan itong Opong.

Sa Biyernes, Sept. 26 tatawirin nito ang Southern Luzon at maaaring maapektuhan ang Bicol Region, Calabarzon at Mimaropa.

Inaasahan ding patuloy itong lalakas habang nasa karagatan at simula bukas ay maaaring magtaas na ng Tropical Cyclone Wind Signal sa bahagi ng Eastern Visayas. (DDC)