Mga ahensya ng gobyerno obligado nang magpalagay ng solar rooftop

Oobligahin na ang lahat ng ahensya ng gobyerno na gumamit ng energy-efficient products at gawing prayoridad ang pagkakaroon ng solar rooftop installations.

Ayon sa Department of Energy, inaprubahan ng Inter-Agency Energy Efficiency and Conservation Committee na nag-aatas sa lahat ng ahensya ng gobyerno sa buong bansa na sumunod sa Minimum Energy Performance Standards o MEPS sa ilalim ng Philippine Energy Labeling Program PELP.

Sa bisa ng kautusan, mababawasan ang konsumo sa kuryente ng public sector at maisusulong ang paggamit ng cleaner technologies.

Sinabi ng DOE, gamit ang alituntunin na nakasaad sa MEPS at PELP, titiyakin na ang mga ahensya ng gobyerno ay bibili lamang ng mga compliant products, para makatipid sa kuryente.

Ayon kay Energy Secretary Sharon Garin, ang matitipid ng gobyerno sa bayarin sa kuryente ay maaari pang magamit sa iba pang serbisyo sa publiko. (DDC)