Religious leader na sangkot sa illegal recruitment arestado ng NBI at DMW

Arestado ang isang religious leader sa ikinasang operasyon sa Baras, Rizal dahil sa pagkakasangkot umano sa illegal recruitment.

Ikinasa ang joint operation ng mga tauhan ng National Bureau of Investigation – Cavite District Office North at Department of Migrant Workers laban sa suspek na si Bishop Reynaldo Basalio ng Faithful Promise Foundation Philippines Inc.

Ayon sa DMW, ginagamit ng suspek ang religious group para ilegal na mag-recruit ng Filipino workers patungong Japan, Korea, at Papua New Guinea, kahit wala silang lisensya mula sa DMW.

Nangangako ito ng mga trabahong factory workers, tea pickers, clerks, accountants, mechanical engineers, at construction workers na may sahod na 36,000 hanggang 120,000 pesos.

Iniisyuhan ang mga biktima ng tourist visa ang mga biktima at pinagsisinungaling sa Immigration na sila ay mga misyonaryo para mapayagan silang makaalis ng bansa, gayunman, kamakailan, ilan sa mga pinaalis ang naharang sa Paliparan.

Mahaharap si Bishop Basalio sa kasong Large-Scale Illegal Recruitment, na isang non-bailable offense sa ilalim ng Republic Act 8042 o Migrant Workers and Overseas Filipinos Act. (DDC)