Babaeng bisita ng PDL sa Bilibid nahulihan ng condom na naglalaman ng ilegal na droga

Isang babaeng bisita ng person deprived of liberty ( PDL) ang huli sa aktong tangkang pagpuslit ng ilegal na droga na isinilid sa condom at itinago sa kanyang pribadong katawan o ari na nagresulta ng agarang pagkaaresto nito sa New Bilibid Prison sa Muntinlupa City kahapon.

Kinilala ni Bureau of Corrections Director General Gregorio Pio P. Catapang Jr. ang suspek na si Rhea Mercado, rehistradong bisita ni PDL Edgardo Mercado na kasalukuyang nakapiit sa Dorm 1C (Quadrant 1), Maximum Security Camp sa NBP.

Batay sa ulat na natanggap ni Catapang mula kay NBP Superintendent Corrections Chief, Roger Boncales, nabunyag na si Mercado ay tumangging sumailalim sa kinakailangang security procedures lalo na sa X-ray body scanning. Dahil dito naalerto ang mga Corrections Officer na nakatalaga sa MaxSeCamp.Nagpahiwatig ng hindi kumportable ang suspek kaya hiniling nito na gumamit ng palikuran o restroom kung saan binantayan siya ng guwardiya, dito nakita ang babae sa alanganing posisyon kung saan nagtangka siyang magtapon ng kahina-hinalang bagay na nagresulta ng pagkadiskubre sa isang condom na naglalaman ng umano’y ilegal na droga.

Ang nakumpiskang mga ebidensiya ay ipinadala sa Philippine Drug Enforcement Agency (PDEA) Forensic Laboratory para isailalim sa pagsusuri habang inihahanda ng otoridad ang pagsasampa ng kaso laban sa suspek.

Sinabi ni Catapang na ang ganitong insidente ay nagbigay-diin sa nagpapatuloy na pagsubok na kinakaharap ng correctional facilities upang pigilan ang drug smuggling at mapanatili ang seguridad sa mga pader nito.

Binigyang-diin ni Director General Catapang na ang ganitong insidente ay tuluy-tuloy na mga hamon na kinakaharap ng BuCor upang labanan ang pagpupuslit ng ilegal na droga at tiyakin ang kaligtasan at seguridad ng kanilang mga pasilidad.

Idinagdag pa ni Catapang na ang pagiging mapanuri ng staff members sa pagtukoy ng kahina-hinalang kilos o galaw ay mahalaga sa pagpapanatili ng kaayusan at pigilan ang paglaganap ng kontrabando sa kulungan.

“As we continue to address these security issues, the case serves as a reminder of the ongoing battle against drug-related activities and the measures necessary to protect correctional facilities from exploitation,” pahayag ni Catapang. (Bhelle Gamboa)