Contractor na campaign donor ni Escudero pagpapaliwanagin ng Comelec

Magpapalabas ng show cause order ang Commission on Elections sa president ng Centerways Construction and Development Inc. para pagpaliwanagin ito sa 30 million pesos na campaign donation kay Senator Francis “Chiz” Escudero noong 2022 elections.

Kinumpirma ni Comelec chairperson George Erwin Garcia na aatasan ng poll body si Lawrence Lubiano para ipaliwanag ang campaign donation at idepensa ang sarili sa kasong paglabag sa Section 95 ng Omnibus Election Code na posible niyang kaharapin.

Sa hearing sa Kamara inamin ni Lubiano ang pagbibigay ng 30 million na donasyon kay Escudero para sa senatorial bid nito pero galing umano sa sarili niyang bulsa ang pera at hindi galing sa kumpanya.

Inamin din ng senador na kaibigan niya si Lubiano at isa ito sa kaniyang campaign contributors. (DDC)