Discaya gustong mag-state witness para hindi makulong – Mayor Vico Sotto

Hindi kumbinsido si Pasig City Mayor Vico Sotto sa mga pasabog ng mag-asawang Curlee at Sarah Discaya sa pagpapatuloy ng pagdinig ng Senate Blue Ribbon Committee sa anomalya ng flood control projects.

Ayon sa alkalde, halata naman talagang may mga congressman, DPWH officials at contractors na nagsabwatan at guilty sa anomalya.

Pero nais aniya ng mag-asawang Discaya na maging state witness para lamang makaligtas sa pagkakakulong.

Sinabi ni Sotto na halatang nagsusunungaling ang mag-asawa nang sabihin ni Curlee na “2-3% lang” ng contract cost ang kita nila kada pryekto at “swerte na” umano kung umabot ng 5%.

Taliwas ito ayon kay Sotto sa pahayag nila sa isang panayam, kung saan sinabi nilang bilyonaryo sila at nasa “11 digits” na ang pera nila.

Apela ni Sotto sa publiko at sa mga nag-iimbestiga, huwag magpauto sa paawa effect ng mag-asawang Discaya. (DDC)