Pormal na pag-iral ng import ban walang epekto sa presyo ng bigas

Nananatiling stable ang presyo ng bigas sa bansa kasunod ng pormal na pagpapatupad ng import ban sa bigas epektibo noong Lunes, Sept.1.

Ayon kay Department of Agriculture spokesperson Assistant Secretary Arnel de Mesa may sapat na suplay ng bigas sa bansa sa kabila ng pag-iral ng animnapung (60) araw na import ban.

Hindi aniya inaasahan na magkakaroon ng epekto sa presyo ng bigas ang ban dahil maraming bigas na nakaimbak sa mga warehouse ng National Food Authority.

Noong buwan ng Agosto sinabi ni De Mesa na mayroong 264,000 Metric Tons ng imported rice ang dumating sa bansa base sa mahigit dalawangdaang (200) sanitary and phyto-sanitary import clearances na inisyu para sa nasabing buwan.

Sa unang bahagi ng taong 2025, naitala naman ang pinakamataas na produksyon ng palay na umabot sa 9.08 million Metric Tons. (DDC)