P605M na halaga ng smuggled na yosi nakumpiska ng BOC sa Bulacan

Nadiskubre ng Bureau of Customs ang libu-libong master cases ng smuggled na sigarilyo sa isang warehouse sa Plaridel, Bulacan.

Ayon sa BOC, aabot sa mahigit 8,600 na master case ng imported na sigarilyo mula China at Vietnam ang natagpuan sa warehouse na nagkakahalaga ng P605.29 million.

Isinagawa ang inspeksyon sa bisa ng Letter of Authority matapops ang intelligence reports mula sa CIIS-MICP sa pamumuno ni Intelligence Officer 4 Alvin Enciso kaugnay sa kanina-hinalang laman ng nasabing warehouse.

Nabatid na ang mga sigarilyo ay walang Bureau of Internal Revenue (BIR) tax stamps at hindi rin nagtataglay ng graphic health warnings.

Pinangunahan ng Intelligence and Enforcement Groups ng BOC ang operasyon katuwang ang Intellectual Property Rights Division, Customs Intelligence and Investigation Service–Manila International Container Port, at Enforcement and Security Service–Port of Manila, sa pakikipag-ugnayan sa Philippine Coast Guard, at mga opisyal ng barangay sa Bulihan.

Tatlo ang naaresto sa operasyon na sasailalim sa inquest proceedings sa Department of Justice.

Nagpalabas na din ng Warrant of Seizure and Detention sa mga bakumpisang sigarilyo dahil sa paglabag sa Section 263 ng National Internal Revenue Code (NIRC) of 1997 at Republic Act No. 10863 o Customs Modernization and Tariff Act (CMTA).

Mahaharap naman sa kasong kriminal ang may-ari ng warehouse.

Ayon kay BOC Commissioner Ariel F. Nepomuceno, magpapatuloy ang proactive enforcement ng ahensya para maawat ang pagpasok sa bansa ng mga smuggled na produkto. (DDC)