May-ari ng SUV na nang-hit and run sa isang lola sa Marikina, pinahaharap sa LTO

Nagpalabas ng show cause order ang Land Transportation Office sa rehistradong may-ari ng isang SUV na nakasagasa at tinakbuhan ang isang 74-anyos na lola sa Marikina City kamakailan.

Ayon kay LTO Chief, Assistant Secretary Atty. Vigor D. Mendoza II ipinadala ang show cause order sa may-ari ng Cherry Tiggo 5X Pro na may plakang NFS-6570 bilang bahagi ng ikakasang imbesigasyon ng kanilang tanggapan na layong matukoy ukng sino ang nagmamaneho ng sasakyan nang mangyari ang insidente.

Sa inisyal na imbestigasyon batay sa kuha ng CCTV sa lugar, nangyari ang insidente sa A. Bonifacio Avenue sa Barangay Tañong kung saan pagkatapos masagasaan ng sasakyan ang lola ay hindi ito huminto at sa halip ay mabilis na pinaharurot ang sasakyan.

Pinasisipot ang may-ari ng sasakyan sa tanggapan ng LTO Intelligence and Investigation Division sa East Avenue, Quezon City sa Sept. 1 para sa isasagawang pagdinig at para magsumite ng written explanation.

Ang driver ng nasabing sasakyan ay mahaharap sa paglabag ng Duty of the Driver in Case of Accident, Reckless Driving at pagiging Improper Person to Operate a Motor Vehicle. (DDC)