Nickel Industry sa bansa nanawagang palayain ang negosyanteng si Joseph Sy

Ipinanawagan ng Philippine Nickel Industry Association o PNIA ang agarang pagpapalaya kay Joseph Sy na chairman ng Global Ferronickel Holdings, Inc. o FNI.

Ito ay makaraang arestuhin ng Bureau of Immigration si Sy dahil sa pagpapanggap umano bilang Pinoy.

Sa pahayag ng PNIA sinabi nitong si Sy ay Filipino citizen at ang kaniyang mga karapatan bilang Pinoy ay ginagarantyahan ng Konstitusyon.

Iginiit ng PNIA na walang legal na basehan ang patuloy na pagkakakulong kay Sy dahil mismong ang BI ang nagkumpirma noon ng kaniyang citizenship.

Dagdag pa ng PNIA para sa business at investment community ay hindi magandang halimbawa ang sinapit ni Sy lalo ngayong tinatrabaho ng Pilipinas na nakuha ang tiwala ng mga investor sa mining industry.

Iginiit ng grupo ang suporta nito kay Sy at nanawagan sa mga otoridad na tiyakin ang pagsunod sa due process. (DDC)